زرار المزامنة: إزاي الكاشير بيكلّم الكونسول
الكاشير بيشتغل من غير إنترنت. البيانات بتتبعت وتتجاب من الكونسول لما تدوس مزامنة بس.
TableTop معمول عشان المطعم يفضل يبيع حتى لو النت فصل. عشان كده تطبيق الكاشير مبيكلّمش الكونسول لوحده، وكل الكلام بينهم بيحصل لما حد يدوس زرار مزامنة.
المزامنة بتعمل إيه؟
لما تدوس مزامنة، الكاشير بيعمل حاجتين:
- يرفع للكونسول كل اللي حصل من آخر مزامنة: الطلبات الجديدة، المرتجعات، حركة الدرج، الحجوزات وتقييمات العملاء.
- ينزّل من الكونسول اللي اتغير بس: المنيو والأسعار، الضرايب، الخصومات، المستخدمين والصلاحيات، وإعدادات الفرع.
الطلبات بتترفع على دفعات، فلو النت قطع في النص، اللي اترفع بيفضل مترفع، والباقي بيترفع في المزامنة الجاية من غير ما يتكرر.
إمتى أدوس مزامنة؟
| الوقت | ليه |
|---|---|
| أول الوردية | عشان تنزل أي أسعار أو أصناف جديدة اتعملت في الكونسول. |
| بعد ما تعدّل المنيو في الكونسول | التعديل مبيوصلش للكاشير غير بعد مزامنة. |
| آخر اليوم أو قبل ما تقفل الوردية | عشان المبيعات تظهر في التقارير والمخزون يتخصم. |
مش لازم تدوس مزامنة بعد كل طلب. الكاشير بيحفظ كل حاجة على الجهاز، والتقارير في الكونسول بتتحدث بعد أول مزامنة.
لو عندك أكتر من كاشير في الفرع
الكاشيرات اللي في نفس الفرع بيكلموا بعض على شبكة المحل (الواي فاي أو الكابل) من غير إنترنت. واحد منهم بيبقى الرئيسي، وهو اللي بيعمل المزامنة مع الكونسول للفرع كله. لو الرئيسي وقف، كاشير تاني بياخد مكانه لوحده.
اقرا أكتر في أكتر من كاشير في نفس الفرع.
المزامنة رفضت أو فضلت تحمّل
- اتأكد إن الجهاز متوصل بالإنترنت (افتح أي موقع).
- اتأكد إن ساعة الجهاز وتاريخه مظبوطين. الكاشير بيرفض المزامنة لو الساعة غلط عشان التقارير متتلخبطش. اقرا ساعة الجهاز غلط.
- لو الرسالة بتقول إن الجهاز مش مفعّل أو اتلغى، اسأل صاحب الحساب يراجع الجهاز من الإدارة › الأجهزة في الكونسول.
مهم: متمسحش التطبيق ولا بياناته قبل ما تعمل مزامنة ناجحة. الطلبات اللي لسه متمترفعتش موجودة على الجهاز بس.
لسه محتاج مساعدة؟
فريق الدعم معاك. ابعتلنا وقولنا المشكلة واسم الفرع.